[حصريـاً] تغطيـه شآمـله لمطعـم فـروج الشـفا بمدينـه الريــاض

Fahad · 16-02-2007, 05:10 AM

سبحان الله وبحمدهـ عدد خلقه وزنه عرشه ومداد كلماته ورضا نفسه

اللهم اغفر للمسلمين والمسلمات الاحياء منهم والاموات الى يوم الدين

هلا آخوانـي وآخواتـي الكــرام

بعد انقطاع دام يومين او 3 ايام لمنتدى دار العرب رجعنـا من جديد

واليـوم جايكم بتغطيـه قمت بهـا انا والاخوان

ahmed-Land rover

والتغطيـه هي لمطعم فـروج الشفـا بمدينه الريـاض بحي التخصصي

صراحه بتقولون المطعم عادي لكن مدح لي المطعم الاخ احمد وقال والله شي

والي شهاني اكثـر كل ماكلمنا احمد قال [ بـرب بروح اسدح لي صاروخين ]

وهالايام مافيه الا قوه سدح صواريخ حتى الظاهر انهم بيفتحون فرع ثالث لهم بسبتنا انا واحمد والاند والله الظاهر نص حلالنا عندهم

سويت لكم تغطيه يارب تعجبــكم

نبدا بسم الله

هذا الكيــس حق فروج الشفــا

فروج الشفـا

الوجبه الشهيه ... والخدمه السريعه

وهـذي صورتـ الكيس الثانـي الي يحطون فيـه الصواريخ الي يسدحها احمد

ونجـي للمفاجاهـ صـوره الشاورمــا اثنـاء التقطيع << اقول فارقنــا بس

وهذي صـوره اسطوانات الغاز حقاتهم والله 3 اسطوانات وكبـر الي بيسرقها بتعيشه سنه لووول وطبعاً نص الغاز مخلص بسبت احمد هههه

وهـذي صورت جدارهم

وهــذي صفه كتـــاشب

وهـذي صوره المكان الي يسون فيه العصيرات وشوفوا شكـل الموز صراحه يشهـــي وعاد الظاهر انهم اليوم متقضين من الربوهـ بفلوس احمد << متسلط على احمد

وهــذي صورت التلفزيون عشـان تآكـل وتشــوف

وهـذي صورت طاولاتهــم شوفوا الكتشب والشطه والمنـاديل عشان تخش جوو

وهــذي صـورهـ عن قــرب للشاورمــا

وهـذي صورهـ للشاورما والموظفين ويظهر بالصوره على اليسار الموظف <<< بكولك

وهــذي صورهـ جميله تصلح خلفيـه لاحمد

وشـوفوا النظام تطلب ويعطونكـ فاتورهـ عشان يطلع رقمكـ ,, ماشاءالله عليك ياحمد امداكـ توصل رقم الطلبات ل 18 الف ..!

وهــذي صورهـ جماعيه للصـواريخ اثنـاء سدحها

طبعاً الصواريخ الي باللون الاحمــر هذي ببطن احمد والي باللون الابيـض هذي ببطن الاخ لاند

بالنهايه ان شاءالله عجبتكــم التغطيه لهالمطعـم الرائع وانصحكم والله تجربونهـ الي بداخل الريـاض والله بينسبط لو يجربه صدقـوني خذوا لكم صاروخ مع كتشب مع كوكتيـل ولا عندك ازين منه
واكيد بعضكم بيقول شجاكم على هالمطعم وليه هو بالذات ؟!

الصراحه حنا دائم نروح للمطعم ثمن نروح لشـارع القراطيس وناكل هناك

وبوصف لكم المطعم للي يحب يجربه

رح مع كبـري الخليج كانك رايح لجامعه الملك سعود الي بعليشه او كانك رايح للعزيزيه ومعرض مملكه السيارات الي بالتخصصي

المهم خل معرض مملكه السيارات على يمينك وبيجيك معرض الوعلان حق هونداي ومرسيدي امش شوي بتجيك اشارهـ وقدامك العزيزيه .. لف يمين بيصير ماكدونلز على يسارك

امش شوي طوالي بتجيك التيسير على يمينك امش شوي بيجيك 3 مطاعم

شف مطعم فروج الشفـا وخذ طلبك واول ماتخلص امش ورح بتجيك اول اشاره رح معها يمين

ثمن امش طوالي لمن تجيك ارض فاضيه ومسوره بخشب على يمينك لف قبلها يمين وعدل وجهيه موترك وولع اللمبات السكن وحط القيـر على الـ N واسحب الجلنط واجلس تطلع بجمال الرياض والفيصيله اثنـاء سدحك للصـواريخ

وبالهنــا والعافيهـ وماشاءالله تبارك الله عليك ياحمد ويا لاند ويافهد عشان ماتصكونن بعين

**alsh8ra** · 16-02-2007, 05:15 AM

احمد ان ماجاك عين اليوم لاتسميني الشقراء انا عن نفسي اقول ماشاء الله تبارك الله
واحلى شيء صورة الجدار >>اموت واعرف ولا اقول سلامتي من الموت ليه تصور الجدار مني فاهمه
بس تغطيه اوكيه صراحه ماقصرت
الشقراء

**BOB MARLEY** · 16-02-2007, 05:16 AM

ههههههههههههههه

كفوا

بس يبو انا اكل واحد اي 3 تخيل اكل 3 صواريخ والله اموت

مشكور للتغطيه الرائعه بس متى هذي الصور

**mr.her0o0o0** · 16-02-2007, 05:17 AM

لا وصيييك تكفى خلهم يفتتحوووون فرع تبوك

يالولد والله ذبحني الجووع الله يسلمك

والله صواايخ ماهي بصااحيه

ماقلتتلي يكثرون الكاتشب

**هبايب** · 16-02-2007, 05:20 AM

اقول يفهد
جوعتني بهتطغطيعه الله يرحم والديك
بس تغطيه صراحه رووووووووووووووعه
وانا مجهز لك م طغطيه بسيطه من ايام المرابطه من المسجد الحرام
بس ابي الختم اللي على الصوره وشلون احطه ؟؟؟؟

**BOB MARLEY** · 16-02-2007, 05:22 AM

تم تقييم الموضوع

احسن شي الصاروخ اول ماقالي احمد للمطعم قلت يع بس طلع رهيب جربوه

واكره شي اشوفه البرستد وع وع استغفر الله لا احد يجربه

**عاشق الفن** · 16-02-2007, 05:28 AM

ههههههههههههههههههههههههههههههههههههههههههههههه بالعافية على قلوبكم ,,, ليش ماعزمتوني معكم