°¨¨™¤¦ تخيل يوم عانقني خيالك خاطري وش قال ¦¤™¨¨°

**عذاااب** · 17-02-2007, 04:21 PM

//
\\
//
\\

تقول لي روعة
وأنا روعتي منـــك
ياللي عطيت الحب
أجمل معانيـــــه
ياعسى الليالي
لشوفتي يجيــبــنك
كل الحقيقــة
قلتها عني و عــنـك
وعن الغـرام
اللي شعورك يغذيــه

====

[] ويـن أنـــت []
ياللي ما بقى غير ذكراك
ياللي على فرقاك
* روحي علـــيله *

[] العــــــام []
يوم إني على طول وياك
عيني بعــينك
* خل يعـــشق خليه *

[] حـــدتنــي []
الدنيا على يوم فــرقاك
ظروف وقـت
و شـوفتك مستحــيله....!!

======

يا صاحبي
لو تفتش خزنة
القلب تفتيش
تلقى بياضه
كما الشاش
وصرف الذهب
غالي ولاني بغشاش
إما اجتماع يجمع
[] إثنين ونعيش []
والا وادع
وصبر الله من عاش...

=====
ترى التغلي مايفيدك
[] يـضــرك []
اللي تغلى نرخـصه
[] لو هويــناه []
ونقول دور غيرنـا
[] من يســرك []
وبعد المودة والصداقة
[] جفيــــناه []
لو كان سلك الحـب
[] عندي يجرك []
حبل الوصول بيني وبينك
[] قـ ـ ـطـ ـعـ ـنـ ـاه []

====

تخيل يوم عانقني خيالك..خاطري وش قال..؟؟
تخيل قــبـــــل أسولف...
نشدني عنك وجداني!!!

نشدني لــــــيــــــــــــــــــن خلاني
مدينة هزها زلزال!!
تــــخــــيـــــل ما هدأ حتى لقاك
((بوسط شرياني))

=====

أنا تعلمت الهوى تحت
يمناك
درست معنى العشق
حسب اختياري
مابيك تعشقني
ولكني ابياك
لاضاقت الدنيا تصير داري
وابيك لامني تزاعلت
وياك
ترضي غروري
قبل اجيب اعتذاري
وابيك تدري لوأحاول
بفرقاك
إني بحاول
قبلها بانتحاري..
=====
العذاب انك تحب
أنسان
مايعرف غلاتك؟؟
العذاب انك تحب
أنسان
يتجاهل حدودك!!
العذاب انك تعذب
كل قلب
يشوف قلبك!
العذاب تعيش
بعالمك
من دون حب!!
العذاب يموت
قلبك
ولا احد
يعرف بموته..!
====
راجع حساباتك بلحظة..
سكونك؟
وخذها نصيحه جعل ربي
يعافيك
مافيه أجمل من حبيب
يصونك
ولافيه أقسى من قريب
يعاديك
أكبر خطأ نسيان من
يذكرونك
وأعظم وفا ذكر شخص
ناسيك
وأكبر قهر لاصار ناس
يبونك
وأنت تبيهم بس حظك
لعب فيك؟
====

ذّكرت قلبي طاري الود
واشتاق ..
شوق الغريب اللي تذّكر
ترابه ..

ورجعت أقلب في قديمات
الأوراق ،،
واللي نسيته طاري الشوق
جابه ،،

ياشين عشرة بعدها يحصل
فراق !!
وعند الوداع الكل ينقل
جراحه !

*****
ياشوق تكفى لاتخليه يرتاح ..!

ياشوق

تكفى داعبه في غيابي..

خله يحس إني معه وين ماراح

خله يحس وشلون لذه

غيابي

عطر الفراق اللى مع غيبته فاح

عطرت به

جرحي وباقي ثيابي

*******
حان الفراق و حل بيني و بينك
كثر الخطا قرب مسافات فرقاك
خلك تذوق و تشتكي من حنينك
و تبكي على وقت مضى العام وياك
هنت الغرام و جاك منهو يهينك
من كاس غدره تشرب المر برضاك

*****
تذكر صاحبك و ارجع
تقرب له ولو بالصوت
على آخر نفس واقف
تجي ولة يجيه الموت،،
و اشوف الموت أحرص منك
و اشوف انك تبي موته،،
و اخاف انك بعد موته
تحن و تفتح التابوت،،
و أخاف من القهر
يقفل،،
في وجهك،،
باب تابوته!!

*****
ادري و الله حبيبي وقتي لك دايم قليل
حيل انا مقصر لكن قلبي لحظة ما نساك
يكفي لا جيتك تهلي،، تبكي إذا جبتك عليل
و تتضايق من همومي،، و الحزن من همي جاك
يكفي متحمل قساتي و الصبر اكبر دليل
صابر و ساكت حياتي،، و مالي عيوني بوفاك

******************

أحبك لين ترفعني ايادي الناس يم قبري،
احبك لين يغمرني تراب القبر و غباره

******************

لا تحسب اني إذا ابطيت ناسيك
ما ينسى عشرة صاحبه غير الانذال
حدتني ظروفي على البعد لا اجيك
هم بوسط القلب و الدمع همال
و إلا انت يا كل الغلا افتخر فيك
غلاك سكن داخل قلبي ولا زال

******************

وش حيلتي ما دام حظي عصاني
اصبحت عاجز حاير في مكاني
و خدي بدمع عيني ياما كويته
هذا القدر مكتوب و العمر فاني....
لكن امانة كان موتي لفاني
قبري تحطونه على باب بيته
يمكن إذا شافه بلحظة بكاني
او ترد الروح في نفس ميته....

******************
******************

ياللي تبي تعرف اسراري و عنواني
الضيق و الحزن و اللوعة عناويني
و إن كان ودك تدورني و تلقاني
في كل لمة حزن يمكن تلاقيني
يكتبني الحزن و الضيقات تقراني
و الناس من زود احزاني تبكيني

******************

"انا"

مثل الذي تايه و ناظر من بعد سراج
لا نوره وصل دربي ولا ملقاه دفاني

"تعال"

تعال اصير لك شاطي إذا حزنك يصير امواج
تعال و خذ فرح قلبي إذا قلبك بدا يعاني

******************

هذا انت،
كل ما ضاقت بي الدنيا تغيب
وكل ما ضاقت بك الدنيا تجيني

هذا انت،
إن كساك الهم صرت اوفى حبيب
و إن نساك الهم تتباهى بأنيني

******************

كل ما العين اذرفت دمع يسيل
قلت هاتي دمع ثاني يغسله
ما بكى يوم الفراق إلا الاصيل
دمعة المخلص تجي مستعجلة
لا طرى له صاحبه يوم الرحيل
شق جيبه و عبرته ما تمهله
إن شكى من هم قالوا له ذليل
و إن كتم همه بجوفه يقتله

******************

ما زلت انا الاول
ابد ما تغيرت؟

ذاك القديم بطيبتي
و بصفاتي!

يجوز حدتني الظروف
و تعثرت؟

بس المهم
إنك العزيز بحياتي..

******************

الله من ليل سهرته لحالي
يوم السما غيمه يغطي نجومه
نامت عيون اللي من الهم خالي
ماهو بمثلي يحترق في همومه
هم يهدم نايفات الجبالي
و الليل طول و ازعجتني حلومه
ما يسهر إلا من فقد شوف غالي
يرعى خياله طول ليله و يومه

******************

ليش تزعل و انت ما تعرف ظروفي؟
ليش ما تسمع كلامي للنهاية؟
اقتنع بالعذر ترضيكم حلوفي
و الله ان اللي حصل ماهو برضاية!!

******************
عساك بخير متهني
بدنيا ما بهل لوعة
و بسمة تملا الدنيا
و ضحكة حيل
مسموعة..

******************

دار الزمن و شفت فيه العجايب
شفت الغلا و البين و الزين و الشين
شفت القلوب الحاقدة و الحبايب
و اللي يعيش بوجه و اللي بوجهين
تلقا الجفا و الصد طبع القرايب
و إلا الوصل و الطيب طبع البعيدين

******************

جيتك شقا و احزان و ****ام و هموم
و جيت انت امل نور عليه حياتي
يا حلم وردي لك مواثيق و لزوم
ما نفترق إلا في يوم المماتي
جددت لي عمر كان شبه معدوم
و لملمت يا خلي بقايا شتاتي
عساك تبقى يا حياتي دايم و دوم
انا السفينة و انت مرسى حياتي

******************

"وينك؟" تجاوب صرختي بسكرة الموت،
"وينك" تشيل اطلال خلك بتابوت
تعال " و أنقلني" على القبر بسكوت
تعال حقق في وفاتي مناتي
ما ابيك تبكي لا ولا تزعج الصوت
لي "الشرف" لو جيت تدفن رفاتي...

******************

هذا هو صوتي اليوم
معكم..
و يمكن بكرة يغيب عن
مسامعكم..
اعذروني إذا فيوم كسرت
خواطركم..
او بكلمه جرحت
مشاعركم..
إذا مت خلوا قبري يملاه
دفى حبكم..
و مثل ما سكنتوا قلبي
سكنوني قلبكم..

******************

أمنتك الله لا يطول غيابك،
وش تنفع الدنيا بليا وجودك
يمكن غيابي ما يسبب عذابك
لكن عذابي يا عذابي صدودك
حاسب ضميرك لا تعجل عتابك
وين الاماني وين باقي وعودك؟
غالي و تبقى غالي في غيابك
لكن يزيد من غلاتك وجودك..

******************

أتحرى من زماني ساعتين
ساعة وداعه و ساعة جيته

و أحترق في كل ساعة مرتين
خوفي ينسى او تطول غيبته

و بس يقبل تعتريني رجفتين
رجفة الفرحة و رجفة هيبته

مات قلبي يا خلايق موتتين
يوم شفته و يوم روحي حبته

******************

المعذرة.. !!
دنياي صارت
شحوحة"
كيف ابتسم..؟
و أحباب قلبي بعيدين..
كيف العمر
يزهى..؟
بليا طموحة"
و كيف العبير
يعيش دون الرياحين..
العفو ثم العفو ثم العفو!! ثم
السموحة"
( قلبي )
المهموم"
في بعدك حزين..

******************

أحبك
لو جروحي
تصير
****ام و قهر و أحزان
أحبك
لو تصير
الماي
و انا أترجاك عطشان
أحبك
لو تصير
الموت و التابوت و الدفان
و كذب
من قال ما احبك!!
احبك..
قسم باللي انزل القرآن!

******************

(( الروح ذكرى ))

و آخر
العمر سكرات
يا كيف ابنسى
روح فيها نجاتي

ما دام بالذكرى
تعيش ابتسامات
استأذنك تبقى

(( ابتسامة حياتي ))

******************

عجزت لأصبر ما تعودت
"فرقاك"

في "غيبتك" ماني على الصبر قاوي
وين انت عني وش
"حياتي" بلياك

عقبك "حياتي" و الممات امتساوي
"زولك" معي دايم و طيفك و ذكراك

"و القلب" ماله غير قربك
مداوي...........

******************

إن كان موتي يا بعد عمري يرضيك،
قلي.. و باسأل خالق الكون موتي
اهون علي من شرهتي.. و من تجافيك،
من اكثر ما اكتم عبرتي.. انبح صوتي
و إن جاك علم الموت.. تكفى بوصيك،
عليك موعد.. دفنتي.. لا يفوتي
و آخر وصية.. جعل ربي يخليك،
خل.. القرايب.. تجهل اسباب.. موتي

******************

ياللي تغرك ضحكتي بعض الاوقات،
احيان بعض الضحك معناه موتي..
اوقات تلقاني احاكيك بسكات،
يوم الكلام يموت داخل سكوتي..
يوم الحناجر تحتضر فيها الآهات،
و أعجز عن الشكوى ولو طال صوتي..
حتى الامل من فرحتي صار يقتات،
و انا اللي كنت احسبه لا قسى الوقت قوتي..

******************

يحسبني يوم سلم ما سمعته
سامعه بس اتغلى عليه
قلت ابثقل، بس ثقلي ما استطعته
و ابتسمت و جيت لمعانق يديه
يحسب اني يوم ما رديت بعته
ما درى اني بكل عمري مشتريه
و الصراحة يوم سلم ما سمعته
كنت افكر كيف انا اسلم عليه..

******************

ضايقة بالحيل محتاجه اشتكي
لولا طبع فيني.. يمديني شكيت
بس ادور عذر من شان البكي
لو يدوسون بطرف ثوبي بكيت
ويش بيدي افعله غير الحكي
قاصرة خطوات رجلي لو مشيت
اسرعي يا نفس موتي و اهلكي
صرتي همي بهالدنيا يوم اني شقيت...

******************

يا عارفين الهوى مرضان بأسبابه
و الحب من صغر سني مشغل بالي
اللي برى الحال مروا بي على بابه
يمكن يداوي جرحي لا نظر حالي
كلمة و بسمة و نظرة عين جذابة
ترد روحي و يصبح خاطري سالي
و إن مت يا صاحبي ترى موتي من أسبابه
موتي من اسباب ذاك الصاحب الغالي..

******************

أشيا كثيره ماتخليني
انساك
اعيشها واطرد بقايا
سرابك
لك ذكريات باقيه لو
فقدناك
صوتك وضحكتك وكلمة
هلا بك
حتي الزمان إلي شهد
يوم لقياك
اليوم يبـــــكي من يوم
فراقك

******************

في غيابك حزن هالعالم سكني
و انكسر قلبي و ضاعت امنياته
غيبتك زادت بجرحن ممتحني
و اثر بقلبي و زود في شتاته
تدري وش حالي بعد ما رحت عني؟
كني اللي منتظر لحظة وفاته!

******************

خذني جريح شعور
يعشق وصالك

ينزف جروح العشق
وأيامه شهود

خذني غريق أحلام
عانق خيالك

يرجي سحاب ايديك
والشوق موقود

خذني بقايا إنسان كلي
حلالك

أسكن عروق القلب
والعشق موجود

******************

لاتكثر بحكيك تري دربك اشواك
ياحفي الرجلين ثمن كل******
واذكر زمان اول وايام بلواك
من سنعك للناس وعدل مق******
لا يفلت لسانك على شخص رباك
انا بنيتك وماانا عاجز اهدمك

******************

بودعك وأنت إللي
ساكن دمي
أبقى بعيد وروحك
معي في ثيابي
وإن سولفوا في
حضورك عن بعض همي
قول لهم كان يعشق
ريحة ترابي
قول لهم لاشرب دمع
الحزن كمي
هذي دموعه ولكن
هي من أسبابي

******************

تحسبني ميت عليك ؟
صدقني تراك غلطان
أحبك أنا قلتها صحيح
بس تدري وش كثرها هالزمان
هي كلمة مثلها مثل غيرها عند الناس صارت دايم تنقال
ايه نعم مني سمعتها!
بس تراني ما أعتبرها إلا (( زلة لسان ))

******************

خلك مع اللي بالكذب يعطيك
وانا ترى بلقى ملايين تسواك
لا تحسب اني برخص النفس وارجيك
ما اذل نفسي لمثلك وشرواك
يحن علي وصلك وقربك ولا اجيك
العيد عيدين وثالثهم يوم فرقاك

.
.

تقبلوا تحياتي ,,

اخوكم , عذ111ب

**دعاء الكروان** · 19-02-2007, 01:32 PM

مشكوووووووووووووور

**فــــــآآآآآرس** · 06-03-2007, 05:10 AM

يعطيك العافيه اخوي

**_Nokia_** · 07-03-2007, 02:42 PM

مشكور على موضوعك ياخوي وبارك الله فيك وبوالديك

اخوك / _Nokia_

**ولد الشيوخ** · 07-03-2007, 10:23 PM

تحسبني ميت عليك ؟
صدقني تراك غلطان
أحبك أنا قلتها صحيح
بس تدري وش كثرها هالزمان
هي كلمة مثلها مثل غيرها عند الناس صارت دايم تنقال
ايه نعم مني سمعتها!
بس تراني ما أعتبرها إلا (( زلة لسان ))

مشكور اخوي على الموضوع الروعة ..

**عربجية دلوعة** · 12-03-2007, 10:37 AM

يعطيك العافية

.. عاشقة دانكن ..

Fahad · 30-03-2007, 03:11 PM