تعالو شوفو

**الــــدلوعه** · 18-04-2007, 03:36 PM

- الناس بتفكر أنه الحكي سهل .. وهو فعلا سهل .. بس الصعب أنك تفكر أيش تحكي .

وأنا هاليومين مالي نفس أفكر لأني بصراحة تعبت من التفكير و بصراحة أكتر مافي فايدة من التفكير .. يعني التفكير لا بيقدم ولا بيأخر .

بس منشان أحرك براغي مخي بدل ما تصدي من الوقفة و خصوصا أنه مخي ماله قطع غيار قلت ياولد ياميكي خربشلك شوي .. على الأقل (تنفس) عن حالك بلاش تفقع في حد وانت ماشي .

والمرة هاي ماراح احكي قصص .. العمر بيخلص والقصص مابتخلص .
بس راح احكي عن صور .. صور بنعيشها وبتمر علينا كل يوم .. صور محتاجة فعلا أعادة نظر فيها .. تعالوا معي نتفرج عليها ومعلش لو ماحد ضحك اليوم .

صورة1 - الدنيا صبح .. والناس بتقول ياهادي .. بدفع نص عمري أشوف واحد او وحدة بيضحك ولا حتى بيبتسم لوجه لله .. الكل بوزو شبرين ويمكن تلات . . وكلمة السلامو عليكم بتطلع بضرب الصرامي .. بصراحة مش عارف ليش هيك ؟؟
هو حزن .. ولا كآبة .. ولا وجع .. ولا سطلان؟؟ أو يمكن جوع .. جوع في كل شي .. المعدة .. المشاعر .. الحب .. و أخيرا .. ألإيمان بالله .

صورة2- في الباص .. أي باص عمومي .. على أي خط ..
شوفير مفكر حاله داخل ( مارثون )
ساقط في القواعد .. قواعد المرور وقواعد العربي .. وقواعد الأخلاق .. وصوت التسجيل أعلى من صوت مدفع الهاون وياريت على اشي ينسمع ... أشي ابراج وأشي النونو واشي سخام على راسه . أما الكنترول فحدث ولا حرج .. سيجارة في (قفا) سيجارة وبيكلمك تقولش وزير الداخلية غير قلة الإحترام و الترباي .. وياويل اللي يحكي .. ومافي حد بيحكي .. الكل بالع لسانه وصرمايته مع احترامي للجميع .( و أدعسهااااااااا)

صورة 3- شباب .. شباب منا وفينا .. من لحمنا ودمنا .. بس مع هيك لحمهم جيف ودمهم زنخ
بنطلون الجنز ملزق ومحزق .. والشعرات علبة ( جيلي ) " مش اسمه جيلي ؟" مكبوب على راس اللي خلفهم والعلكة مابتفارق تمه .. وعقله فااااااااااااضي .. وقال شو ؟؟ فياعة !!
زمان عند ستي وستك كانت كلمة فايع متداولة بينهم بس امتى ؟؟ لما القمل يسرى في راس الولد .. تلاقي هالحجة قالت للحجة والله ابني القمل( فايع) في راسه .. طيب شو وجه الشبه بين القمل وبين شباب اليوم ؟؟ الجواب ... الفياعة!! .

صورة 4- مرات بفكر حالي في امريكا .. !
بتشوف شلة ..مش مهم شباب ولا بنات ( وأغلبهم بيوقفوا في المنطقة الخضراء )!. ماهي البلد قسمين .. منطقة خضرة ومنطقة حمرة ( والذكي يفهم).. المهم بتلاقيهم بيحكوا كلمة عربي وعشرة انكليزي .. تقولش جدهم الكولنيل لنبي ولا خالتهم الملكة (اليزبس)!!.

حلو الواحد يتعلم انكليزي وفرنسي وعبري كمان., بس اللي بيخزي اني أعوج لساني على الطالع والنازل من باب الفشخرة و النفخة الكذابة .. وياريتهم فالحين في دراستهم زي مابيحكوا... بس أيش نقول ؟؟ خليها على ربك . وأقطع ايدي لو ماكانوا في البيت بيحكوا يابا ويمة !! .

صورة 5- البلد بحر .. والناس فيها سمك .. كلنا سمك .. الشاطر مين ياكل مين ؟؟.
بالله عليكم لما يكون هاد أسلوب حياتنا ... ليش نلوم أخت أمريكا واليهود لو ضربونا بالبسطار على راسنا . .؟؟؟.
ياريت نحاول نكون عصافير شوي
( العصافير اللي بتصوصو مش العصافير اللي بالي بالك)

صور ... صور .... صور
شكلها الصور زي القصص مابتخلص!.
احكيلكم شغلة ..!؟
تصبحوا على خير أحسن

**RoMyOoOo** · 18-04-2007, 03:44 PM

شكراا

**solace** · 18-04-2007, 06:38 PM

انا ما ضحكتش اليوم صحيح
انا مت من الضحك صورك كلها صح
تقريبا الضحك ده من الهبل ماهو بيقولوا شر البلية ما يضحك
واقول لك انا كمان تصبح لي خير احسن
ايه ده بس احنا لسه الضهر مش مهم تصبحوا علي صبح

**husam** · 18-04-2007, 06:45 PM

مشكووور

**الــــدلوعه** · 18-04-2007, 11:54 PM

هلاااااا مشكوورين على مروركم ...
تقبلو تحياتي ..
الدلوعه

**Rem0o0** · 20-04-2007, 09:23 PM

تسلم ايدينك عالموضوع

**السنافيه** · 21-04-2007, 12:52 AM

شوووووووووووووووووووووووكراً

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري